ភ្នំពេញ ៖ រដ្ឋបាលរាជធានីភ្នំពេញគ្រោងសម្ពោធស្ពានអាកាសថ្មើរជើងសន្ធរម៉ុក បន្ទាប់ពីការស្ថាបនារួចរាល់បាន ១០០ភាគរយនៅចុងខែមេសានេះ ដើម្បីបង្កភាពងាយស្រួលដល់សិស្សានុសិស្សដែលរៀននៅសាលាសន្ធរម៉ុកក្នុងការឆ្លងផ្លូវនិងមានសុវត្ថិភាព។

ស្ពានអាកាសថ្មើរជើងសន្ធរម៉ុកនេះបានស្ថាបនារួចរាល់ ១០០% នៅចុងខែមេសានេះដែលមានទីតាំងស្ថិតនៅចំណុចភ្លើងស្តុបសន្ឋរម៉ុក ក្នុងខណ្ឌទួលគោក ស្ថិតនៅពីលើមហាវិថីធំៗ ២ខ្សែរួមមាន មហាវិថីកម្ពុជាក្រោម និងមហាវិថីម៉ៅសេទុង នៅលើចំណុចប្រសព្វផ្លូវបែកជា៤ ដែលត្រូវមានអ្នកដើរឆ្លងកាត់ច្រើន ជាពិសេសគឺសិស្សានុសិស្សដែលសិក្សានៅសាលាសន្ធរម៉ុកនេះផ្ទាល់តែម្ដង។

ស្ពានមួយនេះ នឹងធ្វើឲ្យភាពងាយស្រួលក្នុងការធ្វើដំណើរឆ្លងកាត់ដោយជួយកាត់បន្ថយនូវគ្រោះថ្នាក់ជាយថាហេតុ និងមិនបាច់រង់ចាំស្តុប មិនចំណាយពេលយូរដូចជាការពេលដែលមិនទាន់មានស្ពានអាកាស។

គួរបញ្ជាក់ថា មកដល់ពេលនេះ រាជធានីភ្នំពេញ មានស្ពានអាកាសថ្មើរជើងចំនួន៤ កន្លែងហើយ រួមមាន នៅក្នុងខណ្ឌពោធិ៍សែនជ័យ ត្រង់តំបន់ជម្ពូវ័ន្ត មានចំនួន ២កន្លែង នៅតំបន់ភ្លើងស្តុបនាងគង្ហីង ១កន្លែង និងនៅផ្សារដើមគរ ១កន្លែងទៀត ដែលបានបើកសម្ពោធដាក់ឲ្យប្រើប្រាស់ជាផ្លូវការកាលពីខែកក្កដា ឆ្នាំ២០២០កន្លងទៅ៕